بچوں کی تعلیم و تربیت میں ماں باپ بنیادی کردار ادا کرتے ہیں جبکہ اساتذہ ثانوی حیثیت رکھتے ہیں لیکن عام مشاہدہ ہے کہ بچے بھاری بھر کم بستوں کے ساتھ سکول جاتے ہیں اور سکول سے آنے کے بعد ٹیوشن اور ہوم ورک کا جو سلسلہ شروع ہوتا ہے وہ رات گئے تک جاری رہتا ہے۔ میرے اپنے مشاہدے میں یہ بات آئی ہے کہ بچے سارا دن نصابی کتب میں سر کھپاتے ہیں اور امتحانات ہوتے ہی کتابیں اور بستے الماری میں بند کرکے رکھ دیتے ہیں۔ نصابی کتابوں کا مقصد صرف امتحانات پاس کرنا رہ گیا ہے۔ بحیثیت ماں آپ کا فرض بنتا ہے کہ آپ بچوں کی صحیح سمت میں رہنمائی کریں بچے جب سیکھنے کے عمل سے گزر رہے ہوتے ہیں تو ہر اچھی اور بری بات جلد اپنانے کی قدرتی صلاحیت رکھتے ہیں۔ آپ کو چاہیے کہ بچوں کو ایسی عادات اور مشاغل کی جانب راغب کریں جو ان کی نشوونما کے لیے بے حد مفید ہو۔ گرمیوں کی چھٹیاں(اب تو لاک ڈاؤن کی وجہ سے بچے گزشتہ تین ماہ سے مسلسل گھروں میں ہی ہیں) عین صحیح موقع ہوتا ہے جب ماں بچے کو بہت کچھ سکھا سکتی ہے ویسے بھی بچہ سارا دن ماں کے قریب رہتا ہے تو ماں اپنے بچے کے کردار میں بہت اہم رول ادا کرتی ہے جس طرح کھیل کو د بچوں کی جسمانی نشوونما کیلئے بے حد ضروری ہے اسی طرح کتابیں پڑھنا بچوں کے لیے ایک ذہنی مشق کی حیثیت رکھتی ہے۔ بچوں کو غیر نصابی کتب کے مطالعے کی عادت ڈالیں۔ بچوں کو غیر نصابی کتب کے مطالعے سے بہت کچھ سیکھنے کا موقع ملے گا اور وہ ایک مضبوط کردار کے شہری کی حیثیت سے سامنے آئے گا مگر اس کیلئے آپ کو دیکھنا یہ ہے کہ آپ کا بچہ کس قسم کی کتابوں میں دلچسپی رکھتا ہے۔ تاریخ، ادب، مذہب جس میں اس کی دلچسپی ہے اس کو اس کے مطابق مواد مہیا کریں۔ احادیث سے متعلق کتب میں اس کی دلچسپی پیدا کریں تاکہ اس کو اسلام کو سمجھنے کا موقع ملے۔ ان سب کا مقصد یہ ہے کہ بچپن سے ہی اس کی سوچ کے دریچے کھلنا شروع ہو جائیں گے اور وہ زیادہ سے زیادہ غور و فکر کریں گے اور یہ ان کی عملی زندگی میں بھی بہت کام آئے گا اور ویسے بھی کتاب ایک بہترین دوست ہے اور آپ اپنے بچے کو بہترین دوست سے محروم نہ کریں۔ کتابیں بچوں کے لیے ایسا بہترین ساتھی ہیں جو قدم قدم پر بچوں کی رہنمائی کرسکتی ہیں اپنے بچوں کو مثبت کردار کا بنانے کیلئے یہ بے حد ضروری ہے اس لیے مطالعہ کو اپنے بچوں کی زندگی کا حصہ بنائیں۔